009 – 論酒杯的重要性

論酒杯的重要性🍷

成日有人話，飲好酒要識酒，其實識杯都一樣咁重要！
唔好睇少個酒杯，佢唔係淨係用嚟裝酒咁簡單，佢會影響你聞到啲咩、點樣飲落口，甚至令成個飲酒過程更有情調。

👃 香氣原來有學問

杯口闊啲，香味就容易飄出嚟，紅酒就鍾意用呢啲大大隻嘅杯，夠位畀酒「透透氣」，香味自然更豐富

白酒就鍾意啲收口啲嘅杯，集中啲細緻、清新香味

👄 入口感覺唔同晒

杯嘅形狀會影響酒點樣流入口腔，好似香檳杯咁（嗰啲長長地似笛咁嘅），可以令氣泡集中喺舌尖，飲落去勁爽。

不過有得必有失，長笛型香檳杯就會令到香氣比較難發揮，所以飲高品質，層次豐富嘅香檳嗰陣，用返濶口嘅酒杯(eg. 白酒杯），雖然冇咁清爽，但可以令到味道更加完整

👀 睇酒都係享受

玻璃酒杯透明無色，可以慢慢欣賞下酒色，掛杯點樣流、顏色有幾靚，全都係玩味所在。

搖杯都唔係裝模作樣，係想令香味更釋放出嚟，順便睇下酒體有幾豐厚。